Upplýsingar um breytt skólastarf

Ágætu foreldrar

Í ljósi nýjustu tilmæla Almannavarna þarf að endurskoða skipulag skólastarfs frá og með þriðjudeginum 24. mars. Sóttvarnir eru forgangsmál hjá öllum í samfélaginu og eiga þær við allsstaðar og alltaf. Hólfun skóla verður enn markvissari en verið hefur og tekið verður fyrir allan ónauðsynlegan samgang á milli þeirra hvort sem um nemendur eða starfsfólk er að ræða.
Nú er okkur gert að fækka í hópum eldri nemenda og skólar munu því vinna samkvæmt því sem hér segir:

1.-4. bekkur verður áfram fram til hádegis í skólanum skv. sama skipulagi og verið hefur
.    Frístund verður í boði fyrir nemendur í 1. og 2. bekk sem nú þegar eru skráðir til kl. 15 en til kl. 16 fyrir börn foreldra á forgangslista.

5.-7. bekk verður skipt í tvo hópa og mæta nemendur annan hvern dag samkvæmt nánara skipulagi sem ykkur berst frá umsjónarkennara. Ástæðan fyrir þessu er sú að nemendum er fækkað í námshópum, miðað er við 10-12 nemendur í stofu til að geta haldið 2 metra bili á milli nemenda.

8.-10. bekkur verður alfarið í heima- og sjálfsnámi með aðstoð kennara og fá nemendur/foreldrar nánari útfærslu frá umsjónarkennara.
Eindregin tilmæli eru um að þeir foreldrar sem eru heima yfir daginn og geta haft börn sín heima geri það. Það styrkir enn frekar sóttvarnir og auðveldar starfsfólki að halda uppi reglubundnu starfi. Við biðjum foreldra um að láta skólann vita ef nemendur verða heima.

Bestu þakkir fyrir ríkan skilning á stöðunni og það er gott að finna hvernig samtakamátturinn fleytir okkur áfram við aðstæður sem þessar.

Kveðja, skólastjórnendur Lundarskóla