Ágætu foreldrar/forráðamenn nemenda í Lundarskóla.

Árshátíð skólans verður haldin þriðjudaginn 19. febrúar og miðvikudaginn 20.febrúar nk. Að venju sýna nemendur atriði á svið skólans og í ár sýna nemendur í 2. – 8.bekk atriðin sín. Foreldrar og aðrir velunnar skólans eru hjartanlega velkomnir báða dagana gegn vægu gjaldi.

Báða dagana mæta nemendur aðeins á þær sýningar sem þeir eiga að horfa á og/eða leika á. Nánari upplýsingar um hópaskiptingar eru í höndum umsjónarkennara og einnig eru upplýsingar um mætingu nemenda í þeirra höndum.

Frístund opnar kl. 8.00 fyrir þá nemendur sem eru skráðir í frístund og verður opin að venju til 16:00. Skráning fyrir árshátíðardaginn hefur nú þegar farið fram.

Ekki verður boðið upp á hafragraut þennan dag og einungis er gert ráð fyrir hádegismat fyrir þá nemendur sem skráðir eru í vistun. Gott er því að huga að því að nemendur séu með auka nesti ef við á þennan dag.

Aðgangseyrir á sýningar er 500 krónur fyrir fullorðna og nemendur í öðrum skólum, ókeypis er fyrir nemendur skólans og börn undir skólaaldri. Þeir sem fara á fleiri en eina sýningu greiða aðeins einu sinni. Miðasala hefst hálftíma fyrir sýningu.

Kaffihlaðborðið verður á sínum stað og kostar 1300 kr. fyrir fullorðna og 700 fyrir börn. Ágóði af sýningu og kaffihlaðborði rennur í ferðasjóð 10. bekkjar.

Við viljum minna á að nemendum skólans er skylt að mæta á sýningu sem þeir eru skráðir á þar sem hún telst vera hluti af skólatíma. Nemendur mæta í sína stofu 15 mínútum fyrir sýningu sem þau eiga að horfa á og þar verður merkt við nemendur.

Foreldrar sem mæta á sýningu barna sinna verða að hafa það hugfast að leikendur geta ekki sest hjá foreldrum sínum í salnum að leikriti loknu. Þeir munu bíða í sínum stofum þar til sýningu lýkur.

Gert er ráð fyrir að nemendur komi í betri fötum á árshátíðina.

Við hvetjum alla foreldra og skyldmenni til að koma í skólann og eiga ánægjulega stund með börnunum.

Góða skemmtun,

starfsfólk Lundarskóla.